Umunyarwenya akaba n’umukinnyi wa filime Nyambo Jessica yagaragaje impungenge ku myitwarire ya bamwe mu basore n’abagabo bo muri iki gihe, avuga ko hari abatakigira umuhate wo gukora no gushaka iterambere. Ahubwo, ngo bamwe bahitamo kumara igihe kinini mu bikorwa bidafite icyo bibungura, birimo amatiku, ubujajwa ndetse no kwiyandarika ku mbuga nkoranyambaga.
Ibi Nyambo yabigarutseho mu kiganiro yagiranye n’umunyamakuru Murungi Sabin. Muri icyo kiganiro, yavuze ko hari itandukaniro rigaragara hagati y’abagabo bo hambere n’ab’iki gihe. Yavuze ko cyera abagabo bahuraga baganira ku mishinga y’iterambere, ubucuruzi n’ahazaza habo, mu gihe ubu bamwe bahura bagashyira imbere ibiganiro byibanda ku rukundo, abakobwa cyangwa ubuzima bworoshye bifuza kubamo badashyizemo imbaraga nyinshi.
Imbuga nkoranyambaga ziri mu byangiza imitekerereze ya bamwe
Nyambo yavuze ko bamwe mu basore bamara amasaha menshi kuri Snapchat, TikTok n’izindi mbuga nkoranyambaga. Nk’uko abivuga, ayo masaha yakabaye akoreshwa mu kwiga, gushaka ubumenyi cyangwa gukora ibikorwa bibafasha kuzamura imibereho yabo.
Yagize ati: “Uyu munsi usanga umusore abyukira ku mbuga nkoranyambaga, akamara umunsi ari mu bujajwa no muri porotokore zidafite icyo zimwinjiriza. Ayo masaha aba yakabaye ayashakishijemo amafaranga cyangwa yiga ikintu cyamuteza imbere.”
Byongeye kandi, impuguke mu iterambere ry’urubyiruko zikunze kugaragaza ko gukoresha imbuga nkoranyambaga nabi bishobora kugabanya umusaruro no gutuma umuntu atita ku ntego z’igihe kirekire. Nubwo ikoranabuhanga rifite inyungu nyinshi, risaba gukoreshwa mu buryo buboneye kugira ngo ritabangamira iterambere ry’umuntu.
Impungenge ku basore bifuza kubaho ubuzima bworoshye
Nyambo yanenze kandi bamwe mu bagabo bakunda ubuzima bworoshye bwo gutungwa n’abandi aho gukora ngo bishakire ubushobozi. Yavuze ko hari abasore badafite akazi cyangwa ibikorwa bibinjiriza, ariko ugasanga babayeho neza kurusha uko ubushobozi bwabo bwakabaye bumeze.
Ati: “Hari abasore usanga nta kazi bafite ariko babayeho neza. Ibyo bituma bamwe mu bagore bafite amafaranga babashuka bakemera kubabera abo kubamara irungu kugira ngo babone imibereho.”
Yongeyeho ko abakobwa bakwiye kwitondera iyo myitwarire, bakibaza inkomoko y’ubushobozi bw’umuntu igihe babona atagira icyo akora ariko akagaragaza imibereho yo hejuru.
Yagize ati: “Iyo ukundana n’umuntu udakora ariko ukabona ahora ameze neza, ugomba kwibaza aho ayo mafaranga ava. Hari igihe usanga ari ukubaho ubuzima bwo kwishingikiriza ku bandi aho gukora.”
Umuhate n’akazi ni byo biranga umugabo ushaka ejo heza
Nyambo asanga umugabo nyawe akwiye guhora atekereza uburyo yateza imbere ubuzima bwe n’ubw’umuryango we. Nk’uko abivuga, kwiyitaho no gusa neza ni ibintu byiza, ariko ntibigomba gusimbura umurava wo gukora no gutegura ahazaza.
Ati: “Umugabo nyawe abyuka atekereza akazi, amafaranga n’ahazaza he. Ashobora gusa neza no kwiyitaho ariko umwanya munini awumara ashaka icyamuteza imbere aho kuwurangiriza mu matiku no mu bintu bitamwungura.”
Guhindura imyumvire bishobora kuzamura urubyiruko
Nyambo yanagarutse ku basore bakoresha amafaranga make babonye mu kugura ibintu byo kwiyerekana aho kuyashora mu bikorwa bibabyarira inyungu. Yavuze ko iyo myitwarire ishobora kudindiza iterambere ryabo mu gihe kirekire.
Ku bwe, urubyiruko rukwiye gushyira imbere gukora, kwigira no kubaka ubushobozi burambye. Bityo, rushobora kugera ku ntego zarwo no kugira uruhare mu iterambere ry’umuryango n’iry’igihugu muri rusange.
Mu gihe ubushomeri n’ibibazo by’ubukungu bikomeje kugaragara mu bice bitandukanye by’isi, amagambo ya Nyambo ashobora gutera bamwe gutekereza ku buryo bakoresha igihe cyabo n’amahirwe bafite. Nubwo abantu bafite uburenganzira bwo guhitamo imibereho yabo, gushyira imbere umurava, ubumenyi n’akazi bikomeje gufatwa nk’inzira y’ingenzi yo kugera ku iterambere rirambye.
INDI NKURU WASOMA: Junior Giti yavuze ko ubukene n’ubwoba bwa gatanya biri mu bituma urubyiruko rutinya gushinga ingo