Mu buzima bw’urukundo, hari igihe abari mu mubano batangira kubona impinduka zitari zisanzwe. Hari abumva urukundo rugenda rugabanuka buhoro buhoro, abandi bakabona ibiganiro, urugwiro n’imishinga bahuriragaho bitakimeze nka mbere. Abahanga mu mibanire bavuga ko ibi bimenyetso bidakwiye kwirengagizwa kuko bishobora kuba intangiriro y’ibibazo bikomeye mu mubano.
Inzobere mu mibanire y’abashakanye akaba n’umujyanama Alice de Lara, ufite urubuga Conseil Conjugal, agaragaza ko hari ibimenyetso bishobora kwerekana ko umubano uri kujya mu marembera igihe nta gikozwe ngo ukosorwe. Nubwo buri mubano uba ufite umwihariko wawo, hari ibintu byinshi bihurirwaho n’abakundana bageze mu bihe bikomeye.
Kutakigira ubushake bwo kugirana imibonano mpuzabitsina
Kimwe mu bimenyetso bikomeye ni igihe umwe mu bakundana cyangwa abashakanye atakigira ubushake bwo kugirana imibonano mpuzabitsina na mugenzi we. Alice de Lara avuga ko iyo iki gice cy’urukundo gitangiye kugabanuka, bishobora gutuma umwe yiyumva nk’utawe cyangwa utagihabwa agaciro.
Byongeye, kutaganira kuri iki kibazo bishobora guteza umwuka mubi hagati y’abakundana. Iyo ikibazo kidakemutse hakiri kare, umubano ushobora kugenda uzamo agatotsi no kutumvikana.
Gukora ibintu byinshi uri wenyine
Abakundana baba bakeneye umwanya wo gusabana n’inshuti cyangwa gukora ibikorwa byabo bwite. Ariko iyo umwe atangiye gukora ibintu hafi ya byose wenyine, bishobora kuba ikimenyetso cy’uko umubano utagifite imbaraga nkuko byahoze.
Nk’uko Alice de Lara abivuga, iyo umuntu atangiye kubona umutekano n’ibyishimo byinshi hanze y’umubano kurusha mu rugo cyangwa ku mukunzi we, bishobora kugabanya uburyo bubaka urukundo rwabo buri munsi.
Gutangira gutekereza ku wundi muntu
Hari igihe umwe mu bakundana atangira gutekereza ku wundi muntu kubera kutanyurwa n’umubano arimo. Abahanga bavuga ko ibi bishobora guterwa no kubura ibiganiro, urugwiro cyangwa kwiyumva neza mu mubano arimo.
Nubwo gutekereza ku wundi muntu bitahita bisobanura ko urukundo rwarangiye, bishobora gushyira igitutu gikomeye ku mubano. Iyo ikibazo kidaganiriweho, bishobora kuvamo gucana inyuma cyangwa gutandukana.
Kubona amakosa gusa
Mu ntangiriro z’urukundo, abantu benshi bibanda ku byiza by’uwo bakunda. Ariko uko ibibazo byiyongera, hari igihe umwe atangira kubona amakosa gusa ya mugenzi we.
Iyo bigeze kuri uru rwego, ibyishimo mu mubano biragabanuka. Byongeye, kunenga buri kintu bishobora gutuma habaho umwuka wo kutizerana no kutishimira kubana.
Kubura imishinga ibahuza
Abahanga mu mibanire bavuga ko imishinga ihuriweho ifasha abakundana gukomeza kwegerana. Ibyo bishobora kuba ibikorwa by’ubucuruzi, gahunda z’urugo cyangwa n’ibindi bikorwa bibahuza buri gihe.
Iyo buri wese atangiye kubaho ubuzima bwe nta gahunda cyangwa inzozi zihuriweho, umubano ushobora kugenda ucika intege. Kubura ibiganiro no kudahana umwanya nabyo bishobora gutuma urukundo rugabanuka.
Guhora mushwana
Kutumvikana rimwe na rimwe ni ibisanzwe mu mubano. Ariko iyo amakimbirane ahora agaruka buri munsi, bishobora kwerekana ikibazo gikomeye kitigeze gikemurwa.
Alice de Lara asobanura ko hari abahitamo guceceka aho kuganira ku bibazo. Nyuma y’igihe, ibyo bibazo birundana kugeza igihe bitera intonganya zikomeye kandi zihoraho.
Kutakifuza no gukoranaho
Urugwiro ni kimwe mu bintu bikomeza urukundo hagati y’abakundana. Iyo umwe atangiye kumva atakifuza no gukoranaho na mugenzi we, bishobora kuba ikimenyetso cy’uko hari intera y’amarangamutima iri hagati yabo.
Hari n’igihe bamwe batangira gutandukanya ibyumba cyangwa bakirinda igihe kinini cyo kubana. Abasesenguzi bavuga ko ibi bishobora gutuma umubano ujya mu marembera igihe nta biganiro cyangwa ubufasha bibayeho.
Nubwo ibi bimenyetso bishobora gutera impungenge, abahanga mu mibanire bavuga ko atari buri gihe bihita bisobanura iherezo ry’urukundo. Ahubwo, ibiganiro byubaka, kubwizanya ukuri no gushaka ubufasha bw’abajyanama bishobora gufasha abakundana kongera kubaka umubano wabo.
Mu gihe ikibazo gikemuwe hakiri kare, hari amahirwe yo kongera gusubiza icyizere, urugwiro n’umutekano mu mubano. Ariko iyo ibimenyetso birengagijwe igihe kirekire, bishobora kuvamo gutandukana cyangwa kubaho mu mubano udafite ibyishimo.
